स पुनर्द्विविधो बिन्दुः पाण्डरो लोहितस्तथा।
पाण्डरं शुक्लमित्याहुर्लोहिताख्यं महारजः॥ ६०॥
sa punardvividho binduḥ pāṇḍaro lohitastathā |
pāṇḍaraṁ śuklamityāhurlohitākhyaṁ mahārajaḥ || 60||
सिन्दूरव्रातसङ्काशं रविस्थानस्थितं रजः।
शशिस्थानस्थितं शुक्लं तयोरैक्यं सुदुर्लभम्*॥ ६१॥
sindūravrātasaṅkāśaṁ ravisthānasthitaṁ rajaḥ |
śaśisthānasthitaṁ śuklaṁ tayoraikyaṁ sudurlabham || 61||
बिन्दुर्ब्रह्मा रजः शक्तिर्बिन्दुरिन्दू रजो रविः।
उभयोः सङ्गमादेव प्राप्यते परमं पदम्*॥ ६२॥
bindurbrahmā rajaḥ śaktirbindurindū rajo raviḥ |
ubhayoḥ saṅgamādeva prāpyate paramaṁ padam || 62||
वायुना शक्तिचालेन प्रेरितं च यथा रजः।
याति बिन्दुः सदैकत्वं भवेद्दिव्यवपुस्तदा॥ ६३॥
vāyunā śakticālena preritaṁ ca yathā rajaḥ |
yāti binduḥ sadaikatvaṁ bhaveddivyavapustadā || 63||
शुक्लं चन्द्रेण संयुक्तं रजः सूर्येण सङ्गतम्*।
तयोः समरसैकत्वं यो जानाति स योगवित्*॥ ६४॥
śuklaṁ candreṇa saṁyuktaṁ rajaḥ sūryeṇa saṅgatam |
tayoḥ samarasaikatvaṁ yo jānāti sa yogavit || 64||
Bookmarks